Memanik ing Ati

 

Dening: Jadid Al Farisy

Gurit katresnan kanggo anakku cah ayu, Haya Mumtazah Bi'aunillah

Ngger, sinduk cah ayu...

Jo pijer mular, mundhak sasadara kinemul mega

Cup menengo, Ngger...

Lha kae rembulane ndadari

Manjer kawuryan ing madyaning ratri

Sumoroting cahya teja anelahi

Byar gumebyar ing wayah wengi

Duh...ngger sinduk memanik ing ati...

Tak gadang lan kekudang-kudang

Mugi mbesuk dadya putri siwi

Tansah migunani tumraping sesami

Demen agawe becik, linambaran kenceng ing pikir uga bening ing galih,

Kinabekten marang nagari lelangkung agami

Bapa ibumu aja nganti lali,

Kepara nyata sliramu, Cah ayu...

Wus dangu anggene bapak ibu antu-antu,

Nem surya suwene nganti seprene

Sawernane lakon dalah lelaku wus dakliwati

Paribasan segara geni pucuking eri

Nora dadekna ajrih lan cilik ati

Kabeh iki mung kanugrahane Gusti

Maha mirah dalah welas Asih...

Pamujiku nduk, Ngger anakku...

Mugi tansah pinaring kabagas warasan

Sajiwa kasarira, wilujeng kalis nir sambikala,

Aamiin...

Gresik kedhaton, 131021